台灣今天我最美：劉心悠出道十年感動宣言 死穴竟然係廣東話？
大陸網友觀片：http://www.tudou.com/programs/view/KcwSwxnP1Tg/
(Me) 05年，劉心悠膽粗粗參加《阿嫂》試鏡入行，眨眼就十年。她不以為然：「時間過得好快！但又唔會有咩要專登記低嘅。」當然，感恩之言大可下刪三百字，我着眼點是，伊人何不順勢拿三粒星身份證？她冷笑回答：「我未搵到個 point去做呢件事！「本身係加拿大同台灣人，好哋哋，做咩要放棄？好奇怪！」一言驚醒，居港權只不過是內地「專才」有興趣，而伊人擁有的兩個戶籍，正正是想移民港人最後的橋頭堡。「我寧願好似外勞咁，拎住工作證來港工作，唔係仲好咩？」星級外勞另當別論，但也讓我明白她不過當自己是過客，香港是馬拉松訓練場，又或拍燒脂廣告的賺錢之地，不用留太多痕迹在這個驛站吧。是以，這次換個方式，問她十年拾想，可能更有意想不到的答案。
Q：如果冇入行，現在做緊乜？
A：當年興趣係設計傢俬同 figure，好大機會去瑞士同中國讀書。其實我好鍾意瑞士，生活模式好似溫哥華，好適合養老。閒時可以種吓嘢修葺花園，好啱我！
Q：入行前有憧憬嗎？當時有冇諗過想同邊個合作？
A：最能引起我注意嘅係周潤發。當年有齣叫《血仍未冷》，好少華人電影能夠喺溫哥華上映㗎，記得第一個鏡頭發哥一出來，全場華人拍手掌，起身大嗌：「 You rock！」好深刻！我曾夢想同佢合作，可惜仍未有機會。
Q：如果可以揀，想做邊個明星嘅「阿嫂」？
A： Angelina Jolie。我好想知佢哋每晚食飯嘅情景，好似見到唔同嘅語言「飛嚟飛去」，我真係好好奇。唔一定要做阿嫂，做佢屋企清潔阿姐都得。
Q：入行以來最尷尬嘅事係？
A：喺內地拍電視劇，會遇到唔同語言嘅演員，拍攝時你扮到好認真聽佢講嘢，其實完全唔知佢講咩，好多時都有「哎呀！到我！」這類唔記得俾反應嘅蝦碌事情發生。惟有當係一種訓練，後來索性背埋對方台詞，計晒 timing做反應。
Q：還未克服到嘅問題係？
A：廣東話！呢個係死穴。好得意！每次上的士，當我用廣東話講目的地，對方會用普通話講：「小姐，你要怎麼走？」又話我有懶音，其實我已跟足廣東話發音啦，真係唔明呀。
Q：入行後，有冇親身見過心目中的男神？
A：以前男神係 Brad Pitt，依家係 Bradley Cooper。有次去紐約睇花生騷，喺後台見到佢，唉，最後無緣份影到合照。
Q：最回味跟哪位男星拍接吻戲？
A：我揀藍正龍（合演電視劇《幸福的抉擇》）。哈哈！我唔想得罪其他人。特別之處，係導演要求接吻時，要見到男主角條脷先收貨，好深刻呀！
Q：網絡年代好多精采留言，有令你哭笑不得嗎？
A：有次我有份參與嘅內地劇播映，同劇嘅演員發音唔正俾網民笑，有個網友批評：「可能佢國語係數學老師教㗎！」又唔算人身攻擊，但夠幽默。
Q：有留意港劇嗎？想參與嗎？
A：睇緣份。記得細個喺加拿大睇《大時代》，周慧敏好靚，劉青雲好似 chocolate，好活潑。嚟到香港，會認真睇嘅劇集只得《宮心計》，好想做楊怡個奸角角色。好彩幾年前，喺內地拍過類似劇種，總算願望達成。
Q：入行前後，慶祝生日有冇分別？
A：我同媽媽嘅生日都喺愚人節，亦係哥哥張國榮死忌，每年情緒都好複雜。細個經常被整蠱，好有警覺性。正日多數留喺屋企，同朋友只會預祝同補祝。今年好驚，竟然有神秘人送咗 100朵玫瑰加蛋糕去我屋企，從來冇人知我住邊，好恐怖！到依家仲未知邊個送！
Q：喜歡甚麼類型的手袋？
A：比較注重實用性同美觀，工作時會用大袋，同朋友茶聚同行街，一定選擇細袋。
Q：牛仔褲是衣櫃必備嗎？
A：冇錯，牛仔物料給人輕鬆感覺，最重要係非常易襯。
最後我問，十年感動時刻是甚麼。伊人笑笑答：「 I'm still here！呢行有好多新人，比你好，比你靚，喺呢個圈子不斷出現，但十年後我仍在這裡， it means something， I chose to be here。」中英夾雜，我知這是發自內心的說話。客氣程度如同她多謝入境處一次比一次放寬居留期限。「起初只得兩個月，後來一年一年咁續，即係代表歡迎我嚟呢度搵食啦。」我知道，觀眾眼睛最雪亮，用行動贊成該不該留低，心悠 BB同水貨客相比，當然是兩碼子的事啦！
Profile
劉心悠
原名：劉凡平
出生日期： 1981年 4月 1日（白羊座）
出生地：台北縣永和市
身高： 5呎 4吋
體重： 99磅
語言：廣東話、普通話及英語。
學歷：加拿大溫哥華 Emily Carr University of Art and Design產品設計系二年級
簡歷： 04年，回台旅行接拍台灣中華航空公司廣告入行。翌年，參加《阿嫂》試鏡，於過千名參加者之中脫穎而出，正式成為演員。
主要作品：電影《阿嫂》（ 05），《出埃及記》（ 07），《軍雞》（ 08），《愛到底》（ 09），《天生愛情狂》（ 12），《盂蘭神功》，《 Delete愛人》（ 14）；電視劇《幸福的味道》，《幸福的抉擇》（ 08），《步步驚心》（ 11），《唐宮燕》（ 13），《步步驚情》（ 14）。
重溫昔日《台灣今天我最美》：
留言列表
